Полицијата во Куманово вчера приведе малолетно лице под сомнение дека извршило тешко нарушување на приватноста преку злоупотреба на социјалните мрежи. Станува збор за 16-годишен тинејџер кој, според полициските наводи, бил инволвиран во креирање и јавно споделување недозволена содржина.
Од СВР Куманово информираат дека приведувањето е извршено околу 15:20 часот, по претходно поднесена пријава. Малолетникот се сомничи дека изработувал фотомонтажи со експлицитна содржина, на кои била прикажана друга малолетна девојка, а потоа тие материјали ги објавувал на социјалните платформи.
Осомничениот е задржан во полициска станица, каде што се преземаат мерки за целосно расветлување на случајот. По завршување на истражната постапка, надлежните најавуваат поднесување соодветна пријава согласно законските прописи.
