Голема трагедија го потресе хрватскиот град Велика Горица, каде што жена го загубила животот откако скокнала од станбена зграда, а во нејзиниот стан било пронајдено безживотно тело на малолетно девојче.
Според првичните информации, настанот се случил околу 10:50 часот, а полицијата веднаш излегла на терен и започнала истрага за утврдување на сите околности. Неофицијално, медиумите во Хрватска јавуваат дека постои сомнение оти жената претходно ја лишила од живот својата 17-годишна ќерка, по што си го одзела животот.
Трагедијата се случила во станбена зграда лоцирана спроти полициската станица во Велика Горица, што дополнително ја зголеми вознемиреноста кај локалното население.
На местото на настанот се спроведува детална истрага, при што се прибираат докази и се вршат разговори со сведоци и соседи, со цел да се реконструираат настаните што ѝ претходеле на трагедијата. Полицијата најави дека ќе стапи во контакт и со таткото на девојчето.
Телата на починатите ќе бидат транспортирани во Институтот за судска медицина и криминалистика во Загреб, каде што ќе биде извршена обдукција.
Жителите на зградата и соседите изразија шок и неверување. Дел од нив изјавија дека никогаш претходно не се случило нешто слично во нивната околина и дека веста ги потресла.
Според досегашните информации, семејството не било евидентирано во системот за социјална заштита, ниту пак биле преземени мерки од надлежните институции.
Полицијата и обвинителството најавија дека по завршување на истрагата ќе излезат со повеќе детали за случајот.
