Вашингтон, 28 јануари 2025 (МИА) – Администрацијата на Трамп го запре снабдувањето со витални лекови против ХИВ, маларија и туберкулоза во земјите поддржани од американската агенција за помош (УСАИД), се вели во меморандум во кој имале увид западни медиуми.
Изведувачите и партнерите кои работат со Американската агенција за меѓународен развој (УСАИД) почнаа да добиваат известувања веднаш да ја прекинат работата, велат изворите. Овој потег е дел од поширокото замрзнување на американската помош и финансирање што Трамп ги нареди по преземањето на функцијата и ќе трае додека не се разгледа програмата.
Еден таков меморандум беше испратен до Chemonics, голема американска консултантска фирма која работи со УСАИД за снабдување со лекови за голем број болести ширум светот.
Меморандумот ги опфаќа активностите на компанијата во снабдувањето со лекови против ХИВ, маларија и туберкулоза, како и средства за контрацепција и за здравјето на мајките и децата, изјави извор од УСАИД и поранешен функционер на УСАИД.
„Ова е катастрофално“, рече Атул Гаванде, поранешен шеф за глобално здравство во УСАИД, кој ја напушти агенцијата овој месец. „Донираните резерви на лекови одржуваат живи 20 милиони луѓе кои живеат со ХИВ. Тоа завршува денеска“, предупреди тој.
„Прекинот во лекувањето ги става пациентите во ризик од болест и, особено во случај на ХИВ, пренесување на вирусот на други. Тоа исто така значи дека може да се појават соеви отпорни на лекови“, рече Гаванде.
Тој додаде дека и другите партнери се известени дека нема да можат да доставуваат лекови до клиниките дури и ако ги имаат на залиха или отворени клиники ако се финансирани од САД.
„Ова исто така важи и за организациите кои работат со 6,5 милиони сирачиња и ранливи деца со ХИВ во 23 земји“, рече тој.
На 20 јануари, денот кога положи заклетва, Трамп нареди тримесечно замрзнување на странската помош во очекување на оценките за ефективноста и усогласеноста со надворешната политика на САД. Во фискалната 2023 година, САД исплатија 72 милијарди долари помош обезбедија 42 отсто од целата хуманитарна помош, според податоците што ги имаат Обединетите нации во 2024 година.
Од Пандорка Арсовска-Гацова /МИА
