Сообраќајот на државните патишта утрово се одвива непречено, но по претежно влажни коловози, информира Авто-мото сојуз на Македонија. Интензитетот на сообраќај надвор од градските средини е умерен, а на граничните премини, од македонска страна, нема подолги задржувања за влез и излез од државата.
Од 15 ноември 2025 година е на сила законската обврска за задолжително поседување зимска опрема во сите возила, без оглед на моменталните временски услови. Оваа обврска ќе важи до 15 март 2026 година, а од АМСМ потсетуваат дека непоседувањето зимска опрема може да претставува сериозен ризик за безбедноста во сообраќајот.
Апел се упатува до возачите да ја прилагодат брзината на движење, да ја почитуваат поставената сообраќајна сигнализација и внимателно да управуваат со возилата, особено на патиштата низ котлините, речните долини и клисурите, каде постои можност од појава на одрони. Посебна внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен преку Националниот парк Галичица и понатаму останува затворен за сообраќај за сите видови возила, и тоа во периодот од 21 ноември 2025 до 31 март 2026 година.
Воедно, поради тековни градежни активности и рехабилитации, на повеќе патни правци е воведен времен режим на сообраќај. Измени има на делницата Прилеп – Битола, на скопската обиколница, на експресниот пат Крива Паланка – Страцин, како и на патните правци Косоврасти – Мелнички Мост и Гостивар – Стража, каде сообраќајот се одвива со посебна сигнализација и наизменично пропуштање на возилата.
