Сообраќајот на државните патишта утрово се одвива во зимски услови, по наместа влажни коловози, информира Авто мото сојуз на Македонија во дневниот извештај од 24 јануари 2026 година (06:20 часот).
Од надлежните служби посочуваат дека сите државни патишта се проодни и безбедни за сообраќај.
Екипите на ЈП Македонија пат се целосно ангажирани на терен, со потребната механизација и работна сила, при што во континуитет се врши расчистување на снегот. Во координација со ЈП за државни патишта и Министерство за транспорт се преземаат активности за обезбедување непречено и безбедно одвивање на сообраќајот.
Возачите се предупредуваат на значително намалена видливост на повеќе патни правци:
- Тетово – Попова Шапка: 30–40 метри
- Делчево – Пехчево: 50–100 метри
- Куманово – Крива Паланка: 100–150 метри
- Планински превои Ѓавато и Пресека: 100–150 метри
- Плетвар: до 50 метри
Од 15 ноември 2025 до 15 март 2026 година важи законската обврска за задолжително поседување зимска опрема, без оглед на моменталните временски услови.
Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.
АМСМ апелира на прилагодена брзина и внимателно управување, особено на патиштата низ котлини, клисури и речни долини, каде постои опасност од одрони. Зголемена внимателност се препорачува на делниците:
- Катланово – Велес
- Маврово – Дебар – Струга
- Виница – Берово
- Кочани – Делчево
Патниот правец Охрид – Ресен преку Националниот парк Галичица е затворен за сообраќај за сите видови возила во периодот од 21 ноември 2025 до 31 март 2026 година.
