Сообраќајот на државните патишта утринава се одвива непречено, но по влажни коловози, информира АМСМ во најновиот извештај за состојбата на патиштата, објавен на 15 април 2026 година во 6 часот.
Според информациите, интензитетот на сообраќај надвор од градските средини е умерен, додека на граничните премини, од македонска страна, засега нема подолги задржувања ниту за влез, ниту за излез од државата.
Од АМСМ апелираат возачите да ја приспособат брзината на движење кон условите на патот, да ја почитуваат поставената сигнализација и да управуваат внимателно, особено на делниците низ котлини, речни долини и клисури, каде постои опасност од појава на одрони.
Како покритични се посочуваат патните правци Катланово – Велес, Маврово – Дебар – Струга, Виница – Берово и Кочани – Делчево.
Воедно, останува во сила и сезонскиот режим на сообраќај, според кој патниот правец Охрид – Ресен преку националниот парк Галичица и натаму е затворен за сите видови возила.
Покрај ова, на повеќе патни делници низ државата се спроведува времен режим на сообраќај поради градежни активности. Од 14 април започнаа работи на државниот пат А2 на делницата Гостивар – Стража, на мостот број 7, Вијадукт на Дол, каде е воведен времен режим поради санација на мостови.
Активни работи има и на мостовите на реката Вардар во близина на село Желино, на автопатот А2, во двата правци, како и на делницата Смоквица – Гевгелија, каде се изведува премин на интерконективен гасовод под автопатот А1.
На скопската обиколница, на патот А2, се врши рехабилитација на потег од 250 метри, од клучка Волково до клучка Кондово, при што левата лента за претекнување е затворена, а сообраќајот се пренасочува по средната и десната лента.
Времен режим и натаму е во сила и на регионалниот пат Косоврасти – Мелнички Мост, каде се санира свлечиште, како и на мостот Здуње на делницата Гостивар – Стража, каде сообраќајот се регулира со времена семафоризација и наизменично пропуштање на возила.
Дополнително, поради активностите поврзани со изградбата на Коридор 10Д, во тек е времен режим и на патниот правец Прилеп – Битола, каде движењето на возилата се пренасочува по регионалниот пат на потегот од клучка Лагово до Тополчани.
