Јавен обвинител од Основното јавно обвинителство Скопје, по спроведена истрага, поднесе обвинение против три лица и едно правно лице за кривично дело – загрозување на животната средина и природата со отпад.
Според обвинението, во периодот од 28 февруари до 9 јули 2025 година, обвинетите незаконски оставале и складирале опасен отпад на катастарска парцела во Визбегово, без соодветна дозвола од Министерството за животна средина.
Отпадот содржел супстанции со експлозивни, запаливи, токсични и канцерогени својства.
На 9 јули 2025 година на локацијата избувнал пожар кој поради неговиот обем не можел веднаш да биде ставен под контрола, при што согорел дел од неправилно складираниот отпад.
Како последица, во воздухот бил испуштен густ црн чад и било предизвикано сериозно загадување, што било потврдено со мерења на Единицата за атомска, биолошка и хемиска одбрана при АРМ.
Обвинителството посочува дека со ваквите дејствија била предизвикана потенцијална опасност за животот и здравјето на луѓето.
Со истрагата е утврдено дека првообвинетата, како сопственичка и управителка на фирмата, заедно со второобвинетиот свесно ги преземале незаконитите активности. Обвинение е поднесено и против уште една сопственичка на друштвото и на парцелата, која иако не била директно свесна за последиците, според околностите можела и била должна да ги предвиди.
Извор:jorm.gov.mk
