Градоначалникот на Битола, Тони Коњановски, денеска изврши увид во завршната фаза на изградбата на новиот Центар за спорт и спортски активности, објект кој ќе претставува значаен капитален проект за градот. Овој проект е дел од шеснаесетте иницијативи финансирани од владата на Македонија преку Министерството за спорт, со вкупна вредност над 43 милиони денари.
Во моментот, надворешната фасада на објектот е во завршна фаза, додека во внатрешноста се довршува подот. Салата е на два ката, со површина од околу 930 метри квадратни и максимална висина од 7,2 метри. Приземјето е предвидено за физички активности, со административен дел и помошни технички простории.
На западната страна на објектот ќе се наоѓа сала за тренинг, опремена со боксерски ринг и фитнес справи, како и соблекувални за мажи и жени, кои ќе имаат сопствени тоалети и бањи, како и тоалет за лица со посебни потреби. Источната страна е резервирана за просториите на спортско качувачкиот клуб, кои ќе бидат идентични на боксерските, со сала за тренинг и соблекувални.
Салата за бокс и просторијата за болдеринг ќе бидат двовисински, а на горниот кат ќе се наоѓа административниот дел, чајна кујна и тоалети, како и галерија која ќе служи како гледалиште за посетителите.
Околината на објектот ќе биде партерно уредена, со предвиден паркинг, што ќе создаде идеални услови за тренинг и подготовка на битолските и македонските боксери. Битола, со својата богата боксерска историја и актуелни шампиони, конечно добива современи и модерни услови за спортски предизвици.
