Цените на горивата од ноќеска се зголемуваат, откако Регулаторна комисија за енергетика донесе нова одлука за утврдување на највисоките малопродажни цени на нафтените деривати и горивата за транспорт.
Според одлуката, ЕУРОСУПЕР БС-95 ќе се продава по цена од 72 денари за литар, додека ЕУРОСУПЕР БС-98 ќе чини 74 денари за литар. Малопродажната цена на ЕУРОДИЗЕЛ БС (Д-Е V) е утврдена на 66,50 денари за литар, а екстра лесното масло за домаќинство (ЕЛ-1) ќе се продава по 66 денари за литар. Цената на мазутот М-1 НС изнесува 32,987 денари за килограм.
Со оваа одлука, малопродажните цени на нафтените деривати во просек се зголемуваат за 2,46 проценти во однос на цените утврдени со претходната одлука од 12 јануари 2026 година. Бензините и екстра лесното масло поскапуваат за 1,50 денари по литар, дизелот за 2 денари по литар, а мазутот за 0,854 денари по килограм.
Од Регулаторната комисија појаснуваат дека зголемувањето е резултат на растот на референтните цени на светските берзи, каде бензините бележат пораст од над 4 проценти, дизелот од повеќе од 5 проценти, а зголемување е регистрирано и кај екстра лесното масло и мазутот.
Дополнително влијание има и курсот на денарот во однос на американскиот долар, кој во изминатиот период во просек изнесувал 52,78 денари за долар, што е нешто повисоко во споредба со претходната пресметка.
Цените се формирани согласно важечката методологија и во нив е вклучен данокот на додадена вредност. Одлуката предвидува дека трговците можат да ги формираат цените и пониско од утврдените максимални, доколку за тоа имаат услови.
