Двајца осуденици кои биле во бегство од затворски установи во државата денеска беа лишени од слобода во одделни полициски акции спроведени од службениците на Министерство за внатрешни работи на Република Македонија.
Првата акција била реализирана околу 15:00 часот во селото Глуво, скопско, каде полициски службеници од Секторот за меѓународна полициска соработка и Полициското одделение Мирковци го уапсиле 39-годишниот М.Т. од Кочани.
Тој бил баран со потерница по судска наредба поради бегство од КПУ Затвор Идризово, каде издржувал затворска казна во траење од 13 години и 11 месеци за повеќе кривични дела. По апсењето, лицето било спроведено во Полициското одделение Мирковци за понатамошна постапка и враќање во затворската установа.
Претходно, околу 13:20 часот, во одделна акција, полициски службеници од Секторот за меѓународна полициска соработка и ОВР Кочани го привеле и И.Ѓ. (35) од Гевгелија.
Тој бил баран со потерница поради бегство од Затвор Штип, каде требало да издржува казна затвор од осум години и девет месеци за сторено кривично дело. Лицето било спроведено во Полициската станица во Кочани за натамошна постапка.
Од МВР информираат дека се преземаат дополнителни активности за целосно документирање на случаите.
