Италијанскиот производител на луксузни спортски автомобили Ferrari повлекува 552 примероци од својот SUV модел Purosangue на американскиот пазар, поради можен дефект во системот за сопирање.
Според документите доставени до Националната администрација за безбедност во сообраќајот на автопати (NHTSA), постои ризик од контакт помеѓу кабелот за напојување на кутијата со осигурувачи и потпирачот за нозе на совозачот. Овој контакт може да предизвика краток спој и да доведе до намалена ефикасност на сопирачките.
За да го отстрани дефектот, Ferrari ќе инсталира дополнителен изолациски елемент. Компанијата нагласува дека не постои ризик од пожар или електричен удар, и додава дека возилата произведени по февруари 2025 година веќе се опремени со нови, редизајнирани делови.
Интересен е фактот што Ferrari дознал за проблемот откако еден примерок на Purosangue во Кина наишол на истата неисправност.
Како што пренесува Klix.ba, повлекувањето се однесува на возила од моделските години 2023 до 2025, а сопствениците ќе добијат официјално известување од септември годинава.
Ferrari Purosangue е опремен со 6,5-литарски V12 мотор со 715 коњски сили. На предната оска има дискови со дијаметар од 15,7 инчи, а на задната 15 инчи. Ова е првото официјално повлекување за моделот Purosangue, а досега не се забележани поплаки од сопственици.
Најчесто повлекуваниот модел на Ferrari останува F355 од 1995 година, кој бил опфатен со дури шест повлекувања.
