Македонистот Горан Калоѓера преку објава на социјалните мрежи упати остра реакција по, како што наведува, актуелните политички толкувања и полемики околу ликот и делото на Гоце Делчев.
Во својот Фејсбук статус, Калоѓера изразува револт поради изјави и ставови што доаѓаат од Македонија, оценувајќи дека политичарите често зборуваат за историски личности без доволно познавање на сопствената историја.
Тој посочува дека за Гоце Делчев може да се говори единствено низ призмата на времето во кое живеел и на тогашните историски околности, а не преку денешни политички агенди и дневни пресметки.
Калоѓера во објавата нагласува дека Делчев бил доследен поборник за ставот дека Македонија и Одринска Тракија треба да се ослободат самостојно, без влијание од надворешни фактори. Според него, Делчев бил бранител на идејата за автономна и слободна Македонија, како и жесток противник на врховизмот и на влијанието на официјалната бугарска политика врз македонското револуционерно движење.
Во таа насока, Калоѓера остро се спротивставува на квалификациите со кои Делчев се претставува како Бугарин, оценувајќи дека таквите толкувања се спротивни на неговата политичка и револуционерна определба.
Во објавата тој дополнително повикува македонската јавност повеќе да ја чита и проучува сопствената историја, наместо, како што наведува, да ја користи за дневнополитички борби.
Калоѓера го опишува Гоце Делчев како харизматичен лидер, воен стратег, револуционерен водач, просветител и човек вљубен во книгата и пишаниот збор, порачувајќи дека македонските великани треба да се почитуваат, слават и од нив да се учи.
„Не играјте си со своите великани, почитувајте ги и славете ги“, порачува Калоѓера во статусот што предизвика внимание на социјалните мрежи.
