Во февруари 2026 година во земјава биле издадени 244 одобренија за градење, што претставува намалување од 10,3 проценти во споредба со истиот месец лани.
Иако бројот на одобренијата е во пад, вкупната предвидена вредност на објектите достигнала 14.476.578 илјади денари, што е значително зголемување од 195,4 проценти на годишно ниво.
Како клучна причина за ваквиот раст се посочува издаденото одобрение за изградба на ветерен парк за производство на електрична енергија од обновливи извори, со капацитет до 132 мегавати, на подрачјето на општините Штип, Радовиш и Карбинци.
Од вкупниот број издадени одобренија, најголем дел, односно 173 или 70,9 проценти, се однесуваат на објекти од високоградба. За нискоградба биле издадени 25 одобренија, што претставува 10,2 проценти, додека 46 одобренија или 18,9 проценти се наменети за реконструкција.
Податоците покажуваат и дека кај најголем дел од објектите како инвеститори се јавуваат физички лица. Од вкупно 244 објекти, кај 174 објекти, односно 71,3 проценти, инвеститори се граѓани, додека кај 70 објекти или 28,7 проценти инвеститори се деловни субјекти.
Во извештајниот период е предвидена и изградба на 309 станови, со вкупна корисна површина од 36.919 квадратни метри.
