Кандидатот за градоначалник на Општина Карпош и актуелен градоначалник Стевчо Јакимовски преку објава на социјалните мрежи го повика својот противкандидат Сотир Лукровски од ВМРО-ДПМНЕ на телевизиска дебата која, како што најави, треба да се одржи утре во 11 часот на Телма телевизија.
„Соте, трета среќа! Телма пак прави обид за дебата – во 11:00 часот утре. И пак слушам дека бегаш. Добро де, не мора да знаеш сè – кажи што знаеш, па ќе ти простат граѓаните“, напиша Јакимовски во својата објава.
Со ироничен тон, тој му порача на својот противкандидат дека, доколку има страв да настапи сам, може да ја донесе и целата партиска екипа. „Ако и овојпат се плашиш – повикај го ‘родителот старател’ Мицкоски, а можеш да си донесеш и цел кабинет – и Тошковски, и Николовски, и Муцунски, и министерката за финансии – нека ве има на купче. Ќе одиграме симултанка – вие сите со празни ветувања, јас со реални проекти,“ порача Јакимовски.
Во завршницата на објавата, тој истакна дека граѓаните заслужуваат да ги слушнат програмите на кандидатите, а не партиски подготвени говори. „Ајде, Соте, не е страшно. Граѓаните сакаат да слушнат што им нудиш, а не кого чекаш да ти го напише одговорот,“ додаде тој, користејќи ги хаштагите #Карпош #Дебата #ФактиНеЛаги #СотеНеБегај.
Телма телевизија најави дека ќе се обиде повторно да ја реализира дебатата меѓу кандидатите за градоначалник на Карпош, откако претходно, според информациите, Лукровски не се појавил на закажаните термини.
Со овој јавен предизвик, изборната трка во Карпош добива уште поостар тон, а јавноста со интерес очекува дали дебатата конечно ќе се одржи.
