Кандидатот за градоначалник на Општина Карпош од коалицијата „Искуство за успех“, Стевчо Јакимовски, остро реагираше на однесувањето на политичките противници, обвинувајќи ја ВМРО-ДПМНЕ за водење на кампања без транспарентност и искрен дијалог со граѓаните.
Во својата изјава, Јакимовски посочи дека кандидатот на ВМРО-ДПМНЕ бил ставен под строга контрола од сопствената партија, без дозвола да говори на јавни трибини, да одговара на прашања или самостојно да комуницира со јавноста.
– „Наместо вистински соочувања и дебати со граѓаните, нивниот кандидат добил забрана да зборува. Наместо идеи – снима клипчиња со проекти кои јас одамна ги имам реализирано. Наместо визија – повторување на туѓи ветувања“, рече Јакимовски.
Тој додаде дека ваквиот пристап не е фер кон граѓаните на Карпош, кои, како што истакна, заслужуваат отворена и аргументирана политичка кампања.
– „Карпош не е публика за туѓи сценарија и празни ветувања. Граѓаните сакаат луѓе што знаат што направиле, кога направиле и за кого работат. Јас не ветувам, јас покажувам. Сè што сум кажал – сум реализирал“, нагласи Јакимовски.
Во завршницата на своето обраќање, тој апелираше до граѓаните да не дозволат Карпош да стане експеримент на, како што рече, „неуспешни приправници во политика“.
– „Карпош заслужува луѓе со резултати, искуство и почит кон граѓаните. Да го одбраниме Карпош. Да го зачуваме достоинството“, повика кандидатот од коалицијата „Искуство за успех“.
Локалната кампања во Карпош продолжува во атмосфера на зголемена политичка тензија, а жителите на оваа скопска општина ќе имаат можност да го дадат својот глас на претстојните локални избори.
