Полицијата уапси 46-годишен маж од Штип кој лажно се претставил како полициски службеник, одзел службено возило, предизвикал сообраќајна незгода и насилно одзел куче од жена.
Како што информираа од СВР Штип, лицето Б.Х.Ј. (46) било лишено од слобода денес околу 09:00 часот во угостителски објект на улицата „Сутјеска“.
Според информациите од полицијата, околу 08:00 часот пред влез на средно училиште во Штип, осомничениот запрел службено возило „Пежо“ со штипски регистарски ознаки.
Тој се претставил лажно како полициски службеник и извршил лажен претрес на возилото, по што го одзел возилото од лицето М.А. од Штип и се упатил кон населбата Ново Село.
Во текот на движењето, Б.Х.Ј. предизвикал сообраќајна незгода на улицата „Маршал Тито“, удирајќи во паркирано возило, по што продолжил да се движи кон центарот на градот.
Околу 08:45 часот на улицата „Сутјеска“, осомничениот пресретнал жена која се движела со куче и насилно и го одзел кучето, по што се оддалечил од местото.
По преземените мерки од полицијата, возилото било лоцирано, а осомничениот бил уапсен.
При лишувањето од слобода, еден полициски службеник се здобил со телесни повреди, кои биле констатирани во Клиничката болница во Штип.
Од полицијата информираат дека во текот на ноќта истото лице било пријавено и во уште два инциденти:
- расправија и упатување навреди
- оштетување банкомат во објект на улицата „Сутјеска“
По целосно документирање на случајот, против осомничениот ќе биде поднесена соодветна кривична пријава.
