Министерот за локална самоуправа, Златко Перински, денеска ја посети општина Неготино во рамките на активностите од караванот „Каде што срцето е дома“. Оваа посета е дел од напорите на Министерството да се подобри квалитетот на животот на граѓаните преку директна комуникација со локалните власти.
На почетокот на посетата, министерот Перински се сретна со градоначалничката на Неготино, Марија Нацева. Тема на разговорот беа приоритетите на локалната самоуправа и начините за одржување на континуитетот на инвестициите во општината. Градоначалничката Нацева истакна дека во соработка со Министерството за локална самоуправа, успешно се реализирани два значајни проекти. Првиот проект, кој вклучува изградба на тротоари, е финансиран со 4.000.000 денари од МЛС, додека општина Неготино учествуваше со 1.100.000 денари.
Второто значајно вложување е проектот „Еднаков пристап за здравствена грижа на возрасната популација-соочување со предизвиците од деменција“, кој изнесува околу 250.000 евра. Овој проект е резултат на соработката помеѓу општина Неготино и ЈЗУ Здравствен дом Неготино, а Министерството учествува со кофинансирање од 15%.
Министерот Перински одржа и работен состанок со градоначалничката Нацева, советниците во Советот на општината и дел од локалната администрација. На состанокот се дискутираше за секојдневните предизвици со кои се соочуваат граѓаните, како и за динамиката на спроведување на инфраструктурните проекти. Целта беше да се мапираат проблемите и да се предложат решенија за нивно надминување.
Оваа посета на Неготино е важен чекор во насока на подобрување на животот на граѓаните и зајакнување на соработката помеѓу локалната и централната власт.
