Шеесетгодишен жител на Велес пријавил измама во полиција, откако бил доведен во заблуда и оштетен за сума од 12.400 денари, односно околу 200 евра.
Според пријавеното, случајот започнал уште во декември 2025 година, кога оштетениот стапил во контакт со лице кое се претставило како полициски инспектор од Скопје.
Лицето му понудило услуга – да преземе пакет со брендирана облека од наводен негов колега инспектор од Неготино, при што побарало да плати 200 евра, со ветување дека парите подоцна ќе му бидат вратени.
На договорената средба во Велес, наместо со лицето од Неготино, оштетениот се сретнал токму со лицето од Скопје, кое му го предало пакетот и ги земало парите, по што исчезнало.
Дополнително, според пријавата, истото лице во два наврати го измамило и синот на оштетениот, а по одреден период целосно ја прекинало комуникацијата.
Откако сфатиле дека станува збор за измама, случајот бил пријавен во полиција. Надлежните преземаат мерки за негово расчистување.
