Во рамките на караванот „Каде што срцето е дома“ во посета на Куманово беше министерот за локална самоуправа Златко Перински. На средбата со градоначалникот на Општина Куманово Максим Димитриевски и државниот советник за ЕУ Стефан Вангелски, се дискутираше по значајни прашања за добробит на граѓаните и за понатамошниот развој на Општината, со акцент на конкретни решенија и искористување на механизмите за поддршка.
На средбата со членовите на Советот и општинската администрација се разговараше за Ресурсниот центар, зајакнување на локалните капацитети, поддршка на проекти, поттикнување на меѓуопштинска соработка и подобрување на услугите за граѓаните.
Присутните беа на увид на ИПА проектот „Урбано зеленило за здраво дишење во СОУ “Перо Наков”. Овој проект се реализира по Програмата Interreg ИПА Бугарија – Македонија, на кој лидер партнер е Општина Ќустендил, а проектни партнери се Општина Куманово и Центарот за развој на Североисточен плански регион. 85% од финансиската поддршка се на Европската Унија и 15% на Министерството за локална самоуправа на РМ и Министерство за регионален развој на Р. Бугарија.
Во рамки на инвестицијата „Зелена урбана површина и заедничка градина во Куманово“, во СОУ „Перо Наков“ поставени се летниковци, украсни канделабри, клупи, корпи за отпадоци и пешачка патека.
На локација “Октомвриска револуција” насадени се дрвја и изработен дренажен канал кај спортската сала.
Проектните активности ќе продолжат да се спроведуваат и на булеварот “3 МУБ”, плоштад “Маршал Тито” и ЈУОУД “Проф.Мијалковиќ”, а ќе бидат уредени и мали урбани градини на трите кружни текови.
Дополнително ќе бидат изградени дождовни градини,воведени одржливи системи за одводнување, со што ќе се подобри управувањето со дождовните води, намалувајќи го ризикот од локални поплави, а ќе бидат засадени и 740 декоративни цвеќиња.
Со цел развој на мрежата „Зелени градови“, инвестицијата придонесува за подобрување на безбедноста во сообраќајот и квалитетот на воздухот, создавање поздраво урбано опкружување.
