Министерството за внатрешни работи, во соработка со Министерството за здравство и Универзитетската клиника за пластична и реконструктивна хирургија, денеска ги презентираше резултатите од заедничката кампања „Кажи НЕ на пиротехника“, чија цел е подигнување на јавната свест за опасностите од користење пиротехнички средства, особено кај децата и младите.
Министерот за внатрешни работи Панче Тошковски истакна дека во рамки на кампањата биле реализирани низа превентивни и едукативни активности во основните и средните училишта низ државата. Полициски службеници и здравствени работници директно им укажувале на учениците на сериозните ризици и можните трајни последици од неправилната употреба на пиротехника.
„Оваа кампања ја гледаме како долгорочен процес. Нашата цел е јасна – да изградиме свест дека пиротехниката не е играчка ниту забава, туку реална закана по здравјето и безбедноста, особено кога станува збор за децата“, нагласи Тошковски.
Покрај едукативниот дел, министерот информираше дека МВР спровело и засилени оперативни активности за сузбивање на нелегалната продажба и дистрибуција на пиротехнички средства. Само во текот на 2025 година биле запленети над 252.000 парчиња пиротехника, а поднесени се 37 кривични пријави против исто толку лица за недозволено изработување, држење и тргување со оружје или распрскувачки материи.
„Во една од последните акции беа одземени над 35 тони пиротехнички средства, при што беше приведен и полициски службеник. Тоа е јасна порака дека законот важи за сите, без исклучок“, потенцираше Тошковски.
Министерот упати и апел до родителите да покажат зголемена одговорност и да не дозволуваат пристап на децата до пиротехнички средства, со цел спречување на повреди кои можат да остават трајни последици.
Од МВР најавија дека кампањата „Кажи НЕ на пиротехника“ ќе продолжи и во наредниот период, како дел од системскиот пристап за унапредување на јавната безбедност и развивање култура на одговорно однесување.
