Во последните десет дена, државните институции и јавните претпријатија склучиле низа значајни договори за јавни набавки, чија вкупна вредност надминува 16 милиони евра, покажуваат податоците од системот за јавни набавки.
Највредниот договор е склучен од ЈП „Улици и патишта“ – Скопје, и изнесува 295 милиони денари или околу 4,8 милиони евра, за градежни работи.
Втор по вредност е договорот на АД ЕСМ – Електрани на Северна Македонија, кој со компанијата „Зимак Стретен“ од Битола склучил договор од 147 милиони денари (околу 2,39 милиони евра) за набавка на гумени транспортни ленти за потребите на РЕК Битола.
Министерството за одбрана се појавува со два високи договори, секој со вредност од околу 105 милиони денари (по околу 1,7 милиони евра). Првиот е за набавка на мазут М-1 НС од компанијата „Супертрејд“ – Скопје, а вториот за екстра лесно масло за домаќинство од „Пуцко Петрол“ – с. Пласница.
Во делот на локалната самоуправа, Општина Кочани склучила договор од 62,2 милиони денари (над 1 милион евра) со компанијата „Жикол“ од Струмица за изградба на дел од атмосферската канализациона мрежа во градот.
Значаен договор е реализиран и од ЈЗУ Клиника за детски болести, која за 49,3 милиони денари (околу 802 илјади евра) набавува хормон за раст и инхалациона терапија од компанијата „Еуро-Фарм“ – Битола.
Министерството за внатрешни работи склучило договор со „Винер Лајф – Виена Иншуренс Груп“ во износ од 45 милиони денари (над 730 илјади евра) за услуги за осигурување.
Во областа на дигитализацијата, Управата за јавни приходи, преку Министерството за финансии, реализирала набавка од 36,2 милиони денари (околу 589 илјади евра) за хардвер и софтвер за модернизација и зајакнување на ИТ инфраструктурата, со фирмата „Коммпакт Технолоџис“ – Скопје.
Меѓу поголемите договори е и оној на ЈПКД „Комуналец“ – Струмица, кој за 35,4 милиони денари набавува електрична енергија од ЕВН Македонија, како и договорот на Општина Неготино од 33,4 милиони денари за изградба на кружен тек кај семафорите на улицата „Маршал Тито“, склучен со компанијата „Градба Промет“ – Кавадарци.
Податоците покажуваат дека најголем дел од средствата се насочени кон инфраструктура, енергија и снабдување на јавниот сектор, што традиционално претставува најголем дел од јавната потрошувачка на крајот од годината.
