Утрово во 7 часот, најниската температура во земјава е измерена на Попова Шапка, каде што живата на термометарот се спушти до минус 4 степени Целзиусови. Истовремено, токму таму е регистрирана и највисока снежна покривка – 31 сантиметар.
Според податоците на Управа за хидрометеоролошки работи (УХМР), снежна покривка од 2 сантиметри има и во Крива Паланка.
Најмногу дожд во Крушево
Во изминатите 24 часа, најобилни врнежи од дожд се измерени во Крушево, каде наврнале 55 литри на метар квадратен. Веднаш по него следуваат Охрид со 52 литри, Претор со 48 и Маврови Анови со 39 литри дожд.
Значителни количества врнежи се регистрирани и во Пожаране (35), Крива Паланка (34), Битола (32), Тетово (31), Прилеп (24) и Тополчани (24).
Во Скопје, на мерната станица Зајчев Рид се измерени 14 литри дожд, додека на Петровец – 12 литри на метар квадратен.
Утрински температури низ земјава
Минусни температури, покрај на Попова Шапка, се регистрирани и во Куманово (-3), како и на мерните станици Скопје-Петровец, Скопје-Зајчев Рид и Маврови Анови (-1).
Температура од 0 степени е измерена во Крива Паланка, Штип, Велес и Крушево, додека најтопло утрово било во Гевгелија, со измерени 7 степени.
Прогноза за денеска
Времето денеска ќе биде променливо облачно, со повремени локални врнежи од снег, а во пониските предели од дожд и снег. Ќе дува умерен, на места повремено засилен северозападен ветер, со брзина над 60 километри на час.
Максималната дневна температура ќе се движи од 1 до 8 степени Целзиусови. Во Скопје, се очекува променливо облачно време, претпладне со повремени врнежи од снег и умерен до засилен северен ветер, а дневната температура ќе достигне до 2 степени.
