Полицијата спроведе обемна акција во повеќе угостителски објекти и казина во Скопје, при што беа констатирани бројни прекршоци и приведени неколку лица.
Контролите се реализирале во текот на ноќта меѓу 27 и 28 март, во периодот од 20:00 до 03:00 часот, на подрачјата на општините Карпош и Кисела Вода, со цел одржување на стабилна безбедносна состојба.
Во општина Карпош, полицијата извршила проверки во шест угостителски објекти и две казина. При акцијата, едно лице било лишено од слобода поради поседување дрога, додека три лица биле приведени за утврдување на идентитет.
Дополнително, биле изречени мерки за нарушување на јавниот ред и мир, како и 37 санкции поради прекршоци во сообраќајот. Две возила биле отстранети со специјално возило „пајак“.
Паралелно, во Кисела Вода, полицијата заедно со инспектори од Државниот пазарен инспекторат извршила контроли во седум казина и седум угостителски објекти.
Во шест казина биле утврдени прекршоци поврзани со законите за пушење, лична идентификација и приватно обезбедување. Кај дел од угостителските објекти биле констатирани нерегуларности, меѓу кои и работа без дозвола за летна тераса, како и пречекорување на дозволеното работно време.
Надлежните институции информираат дека за сите утврдени прекршоци се изречени соодветни санкции.
