Околу 300 лица заболени од хемофилија веќе повеќе од шест месеци се соочуваат со сериозен прекин во терапијата, поради тоа што државата сè уште не обезбедила навремена набавка на неопходниот лек „Фактор 8“. На проблемот јавно укажа политичката партија Левица, оценувајќи дека станува збор за алармантна состојба која директно го загрозува здравјето на пациентите.
Според наводите, поради нераспишан тендер, болните од хемофилија со месеци остануваат без основната терапија, што, како што предупредуваат пациентите, доведува до сериозни компликации, вклучително и ризик од трајно оштетување на мускулите и зглобовите. Дел од нив, како што се наведува, се принудени да поминуваат долг период во домашни услови, со значително влошен квалитет на живот.
Од партијата наведуваат дека пациентите добивале неформални објаснувања од надлежните институции дека набавката била одложувана поради избори и празници, што, според нив, е недозволиво кога станува збор за животно важна терапија. Во реакцијата се истакнува дека здравјето на лицата со ретки и тешки хронични заболувања не смее да биде предмет на административни одложувања.
Левица упати јавен апел до Министерството за здравство, до министерот Азир Алиу, како и до премиерот Христијан Мицкоски, барајќи итно обезбедување континуирана терапија за сите пациенти со хемофилија и воспоставување системско решение со кое вакви прекини во лекувањето нема да се повторуваат.
„Здравјето на граѓаните не смее да биде заложник на бирократска неефикасност“, се наведува во реакцијата, со пораката дека државата има обврска да гарантира навремен и непречен пристап до есенцијални лекови, особено за пациентите со ретки болести.
