Кандидатот за градоначалник на општина Чаир, Бујар Османи, денеска го презентираше својот амбициозен план за создавање на почист и поубав Чаир. Во рамките на својата стратегија, Османи најави формирање на ново комунално претпријатие под името ‘За чист Чаир’, со цел да се ангажираат 120 хигиеничари, кои ќе работат според јасно дефиниран систем. „Валкана општина е огледало на општина што не ги почитува сопствените граѓани. Затоа, денес излегувам со ветување дека од првиот ден ќе формираме посебно претпријатие за чистење на општината“, изјави Османи.
Тој истакна дека Чаир не смее да остане најзагадената и највалканата општина во Скопје. „Ниту едно дете не треба да игра во паркови преполни со отпадоци, ниту една мајка не треба да го носи своето дете по улици натрупани со ѓубре. Доста беше со импровизации и партиски вработувања“, додаде Османи на прес-конференцијата.
Османи се обврза да го издигне прашањето за чистотата во Чаир во општонародно движење, вклучувајќи ги граѓаните, училиштата и месните заедници во волонтерски акции за чистење. „Сакам чистотата во Чаир да стане приоритет веднаш по училиштата, а граѓаните да станат дел од напорот Чаир да се ослободи од етикетата дека е највалкана општина во Скопје“, нагласи тој.
Тој исто така подвлече дека хигиената не е само естетика, туку и прашање на здравје и почит кон граѓаните. „Ветувам: оваа слика ќе се промени“, рече Османи, додавајќи дека ќе се воспостави редовна анализа на квалитетот на услугите, заснована на реакциите на граѓаните.
Во своето обраќање, Османи истакна дека во Чаир се крева ново движење, кое е поголемо од било која изборна кампања. „На 19 октомври народот на Чаир ќе излезе масовно и ќе го порази системот за купување на волјата на граѓаните“, нагласи Османи. Тој додаде дека се буди енергија на отпор кон корупцијата и клиентелизмот, со надеж дека граѓаните ќе се обединат за да го ослободат Чаир.
„Се буди движење за достоинство. Движење на отпорот за нов, чист Чаир, со модерни училишта и безбедни улици. Мојата улога е само да бидам глас на таа енергија“, заклучи Османи, повикувајќи ги граѓаните да се кренат и да кажат: доста е.
