Едно лице е повредено во вооружена пресметка меѓу две групи на Бит Пазар, која се случила денеска околу 14 часот, на раскрсницата меѓу улиците Војдан Чернодрински и околните сообраќајници, недалеку од полициската станица.
Според очевидци, престрелката траела кратко, но се одвивала во период кога на улицата имало голем број минувачи, вклучително и деца. Куршумите завршиле во неколку околни објекти, при што се оштетени излозите на неколку дуќани, како и неколку паркирани возила.
Сопствениците на продавниците одбиваат да зборуваат јавно, но велат дека настанот предизвикал паника и страв кај случајните минувачи и локалното население.
Од Министерството за внатрешни работи потврдуваат дека се работи за вооружен судир меѓу две групи од по пет до шест лица. „На местото на настанот се пронајдени повеќе чаури, а покрај повреденото лице, причинета е материјална штета на неколку деловни објекти и возила“, информираат од МВР, додавајќи дека се преземаат мерки за целосно расчистување на случајот.
Полицијата го обезбедуваше местото на настанот, а улицата беше затворена за сообраќај додека траеше увидот. Повредениот е пренесен на Клиниката за ургентна медицина, а засега нема официјални информации дали се идентификувани или уапсени учесниците во престрелката.
