Саудиска Арабија планира да го прошири својот програм за премиум резиденција со цел да привлече инвеститори, богати поединци и врвни студенти. Овој програм е дел од стратегијата „Визија 2030“ на саудискиот престолонаследник Мохамед бин Салман, која има за цел да ја диверзифицира економијата на земјата и да ја намали зависноста од нафтата.
Според информации од Ројтерс, новите критериуми би можеле да вклучуваат сопственици на суперјахти, инвеститори во луксузни проекти како што е комплексот Дирија во Ријад, вреден 60 милијарди долари, како и студенти со изврсни резултати. Тековниот програм им овозможува резиденција на менаџери со месечна плата над 80.000 ријала (околу 21.300 долари) и на стручњаци во медицината и науката со примања над 35.000 ријала месечно.
Програмата нуди бенефити како што се влез во Саудиска Арабија без виза, добивање работна дозвола и можност за пренос на статусот на членови на семејството. Властите во Ријад веќе го проширија програмот на купувачи на недвижности во Саудиска Арабија вредни повеќе од милион долари. Во минатата година, Саудиска Арабија ги ублажи рестрикциите на алкохол, а од 22. јануари е дозволено и сопствеништво на резиденцијални и комерцијални недвижности за странци во одредени делови на земјата.
Овие потези се дел од пошироката стратегија на Ријад да ја направи земјата поатрактивна за странски посетители, инвестиции и луксузен туризам, истакнува британската агенција.
