Повеќе гранични премини низ државата се соочуваат со блокади за тешки товарни возила, додека сообраќајот за останатите категории се одвива без поголеми пречки, информираат надлежните служби.
Од вчера напладне, забранет е излезот од државата за тешки товарни возила на повеќе гранични премини. Блокадите се однесуваат исклучиво на товарниот сообраќај, додека патничките возила минуваат непречено.
Дополнително, пред граничниот премин Долно Блаце е започнат протест на превозници со тешки моторни возила. Поради тоа, товарниот сообраќај се пренасочува преку БП Дизел, а останатиот сообраќај се одвива нормално.
Сообраќајот на државните патишта се одвива непречено, но по влажни коловози. Слаб снег паѓа на повисоките планински превои Попова Шапка и Ѓавато, но засега не се задржува на коловозот.
Возачите се потсетуваат дека од 15 ноември 2025 до 15 март 2026 година важи законска обврска за задолжително поседување зимска опрема во сите возила, без разлика на временските услови.
Надвор од градските средини, интензитетот на сообраќај е умерен, а на граничните премини, од македонска страна, нема подолги задржувања за влез и излез од државата.
АМСМ апелира на зголемено внимание, прилагодена брзина и почитување на сообраќајната сигнализација, особено на делниците каде постои ризик од одрони:
- Катланово – Велес
- Маврово – Дебар – Струга
- Виница – Берово
- Кочани – Делчево
Патниот правец Охрид – Ресен преку Националниот парк Галичица е затворен за сообраќај за сите видови возила до 31 март 2026 година.
Поради тековни градежни активности и санации, на повеќе патни правци е воведен времен режим на сообраќај, со пренасочувања, рачна регулација или семафоризација. Возачите се повикуваат да ја следат поставената сигнализација и навремено да се информираат пред патување.
