Уставниот суд донесе одлука за поништување на Законот за солидарен данок, што значи дека државата ќе мора да врати околу 49,2 милиони евра на 156 компании. Претседателот на Уставен, Дарко Костадиновски, на прес-конференција изјави дека компаниите ќе имаат право да бараат враќање на парите во рок од пет години, доколку сметаат дека им биле нарушени правата.
Министерството за финансии веднаш по одлуката соопшти дека ќе постапи по објавувањето во Службен весник и ќе ги регулира буџетските обврски.
Постапката за оценка на уставноста на законот започна на 20 ноември 2024, а денес беше донесена конечната одлука. Законот за солидарен данок беше воведен како еднократна давачка за 2023 година, кој го плаќаа компании со приход поголем од 10 милиони евра во 2022. Целта беше да се соберат средства за ублажување на последиците од кризата.
Законскиот акт беше оспорен од Стопанската комора и други фирми, со аргумент дека нарушува основни принципи како правната сигурност и предвидливост, а исто така создава нееднаквост меѓу компаниите и вмешување во правото на сопственост и слободниот пазар.
Премиерот Христијан Мицкоски изјави дека ако се поништи законот, државата ќе ги врати парите, но и ќе се разгледа можноста за кривична одговорност за оние што го донеле законот, бидејќи буџетот бил оштетен. Законот за солидарен данок беше усвоен во септември 2023 година.
