Сообраќајот на државните патишта утрово се одвива во зимски услови, по претежно влажни коловози, информираат од АМСМ во најновиот извештај објавен во 07:31 часот. Поради обилните снежни врнежи, воведена е забрана за сообраќај на товарни моторни возила на патниот правец од Мавровска крстосница кон Маврово и Дебар.
Интензитетот на сообраќај надвор од градските средини е умерен, а на граничните премини од македонска страна засега нема подолги задржувања за влез и излез од државата. Сепак, од АМСМ апелираат на зголемена внимателност, прилагодена брзина и строго почитување на сообраќајната сигнализација, особено на делниците што минуваат низ котлини, клисури и речни долини, каде постои ризик од одрони. Како критични се посочуваат патните правци Катланово – Велес, Маврово – Дебар – Струга, Виница – Берово и Кочани – Делчево.
Потсетување до возачите дека од 15 ноември е на сила законската обврска за задолжително поседување зимска опрема во сите возила, независно од моменталните временски услови, и таа ќе важи до 15 март 2026 година.
Во сила останува и сезонската забрана за сообраќај на патниот правец Охрид – Ресен преку Националниот парк Галичица, која важи до крајот на март, а затворен е за сите видови возила.
Паралелно, на повеќе патни делници во земјава се изведуваат градежни активности. На Коридор 10, на делницата Прилеп – Битола, сообраќајот е пренасочен по регионалниот пат Р1101. На скопската обиколница, на државниот пат А2, во тек е рехабилитација на делница од 250 метри помеѓу клучките Волково и Кондово, при што левата лента за претекнување е затворена, а сообраќајот се одвива по преостанатите ленти.
На експресниот пат Крива Паланка – Страцин, во близина на селото Петралица, сообраќајот се регулира наизменично поради градежни активности, со рачна регулација преку ден и семафори во вечерните часови. Дополнително, на регионалниот пат Косоврасти – Мелнички Мост е воведен времен режим поради санација на свлечиште, додека на делницата Гостивар – Стража, кај мостот Здуње, сообраќајот се одвива наизменично поради продолжени градежни работи, кои ќе траат неколку месеци.
Од АМСМ уште еднаш апелираат возачите да тргнуваат на пат со соодветно подготвени возила и да ги следат редовните информации за состојбата на патиштата, особено во услови на снег и ниски температури.
