Од 10 април 2026 година започнува целосната имплементација на новиот систем за влез и излез во Европската унија (EES – Entry/Exit System), со што се воведува дигитализиран начин на евиденција и контрола на патниците од земји кои не се членки на ЕУ, информираат од Министерството за внатрешни работи.
Со новиот систем, сите влезови и излези од ЕУ ќе се регистрираат електронски, а ќе се обработуваат и основни биометриски податоци, како отпечатоци од прсти и фотографија. Целта е побрза идентификација на патниците и поефикасно следење на дозволениот престој, согласно правилото „90 дена во период од 180 дена“.
Од МВР посочуваат дека со воведувањето на системот е можно зголемување на времето на задржување на граничните премини при влез во ЕУ, особено во почетниот период на имплементација.
Воедно, од Граничната полиција информираат дека се преземени сите потребни мерки за обезбедување непречен проток на патници. Во функција се ставени сите расположливи технички средства и човечки ресурси, а ќе има и засилено присуство на терен.
Надлежните најавуваат дека состојбата ќе се следи континуирано, а граѓаните ќе бидат навремено информирани за сите промени и важни информации поврзани со новиот систем.
