Основното јавно обвинителство во Кичево доби кривична пријава против две лица од Кичево, поради сомневање за злоупотреби поврзани со проект за јавно-приватно партнерство за улично осветлување.
Станува збор за Ф.Д. (51), кој во својство на градоначалник на Општина Кичево се товари за продолжено кривично дело „злоупотреба на службена положба“, како и за Б.К. (46), раководител на сектор во општината, кој се сомничи за „несовесно работење во службата“.
Според истрагата, во периодот од април 2021 до ноември 2025 година, првопријавениот, како службено и одговорно лице, при подготовката и спроведувањето на договорот за модернизација на уличното осветлување, прекршил одредби од Законот за концесии и јавно-приватно партнерство, како и од Законот за јавни набавки.
Се сомничи дека договорот, склучен во ноември 2021 година со конзорциум од три приватни компании, бил доделен на блиски лица со намера за стекнување противправна имотна корист од големи размери.
Со овие дејствија, според пријавата, на буџетот на Општина Кичево му била нанесена штета од околу 1,62 милиони евра, односно над 99 милиони денари, што претставува износ на исплатените ануитети кон приватниот конзорциум.
Второпријавениот, како раководител на сектор за финансии и претседател на комисијата за спроведување на постапката, се сомничи дека не извршил соодветен надзор и несовесно постапувал во извршувањето на своите службени должности, со што овозможил нанесување на штета на општинскиот буџет.
Надлежните институции продолжуваат со постапката за целосно расчистување на случајот.
