Настапи денот на Божјото откровение – Богојавление, празникот кога, според христијанското учење, Бог не само што Му се објави на човекот, туку повторно влезе во историјата за да ја преобрази однатре. Денот кога небесата се отвораат како жива благодатна стварност, а човекот се повикува на духовно будење и богопознание преку светлината на Света Троица – Отецот, Синот и Светиот Дух.
И годинава, празникот беше свечено одбележан од монашката заедница и верниот народ во храмот на Пресвета Богородица – Ростуше, каде што бројни верници се собраа на молитва и заедничко учество во Светата Василиева Литургија. Со богослужбата чиноначалствуваше епископ Антаниски г. Партениј, игумен и духовен старец, а литургијата претставуваше средиште на целокупното празнично торжество.
Храмот во Ростуше беше исполнет со верници кои, како една Црква и едно тело Христово, пристапија кон светата Евхаристија, сведочејќи за живата вера и заедничкото учество во Празникот на Светлините. Молитвената атмосфера, сплотеноста и радосните лица беа одраз на длабоката духовна смисла на Богојавлението – празник на очистување, обновување и просветление.
По завршувањето на Литургијата, од храмот тргна свечена молитвена литија кон реката Радика. Со молитва и славословие, верниците се упатија кон водите, симболично продолжувајќи ја литургиската соборност надвор од храмот, сведочејќи дека и природата е повикана да стане простор на Божјото присуство.
На мостот над Радика беше извршен Големиот Богојавленски водосвет, при што чесниот крст беше положен во осветените води како знак дека Христовата благодат го допира и го преобразува целиот тек на човечкиот и природниот живот. На настанот присуствуваа околу четиристотини верници, кои со трепет го очекуваа чинот на фрлањето на крстот.
Честа да го извади чесниот крст од водите ја имаше 23-годишниот Милко Божиновски од Ростуше, кој прими благослов и молитви од владиката. Пригодни награди за крстопоклоникот обезбедија пријатели на манастирската заедница, како и Онер Јакуповски, градоначалник на Општина Маврово и Ростуше.
На празничното свештенодејствие присуствуваше и Денион Мејдани, амбасадор на Република Албанија, кој заедно со верниот народ ја сподели радоста на овој голем христијански празник, нагласувајќи ја неговата духовна и човечка димензија.
Со светата Литургија, литијата и осветувањето на водите, и ова Богојавление беше доживеано како жив настан на Црквата, празник во кој човекот и природата, осветлени од Троичната светлина, ја почувствуваа благодатта на обновувањето.
