Во текот на изминатото деноноќие, полициските службеници на територијата на целата држава лишиле од слобода 17 возачи поради безобѕирно управување со моторни возила.
Според информациите од полицијата, деветмина возеле без возачка дозвола, од кои шест во Скопје, а по еден во Гевгелија, Прилеп и Кичево. Дополнително, еден возач од Делчево управувал мотоцикл без возачка дозвола.
Тројца возачи, од кои двајца од Скопје и еден од Кичево, биле затекнати како управуваат возило под дејство на алкохол. Уште двајца возачи од Скопје управувале возила иако имале активна забрана за управување.
Покрај тоа, двајца возачи од Скопје биле затекнати како возат без регистарски ознаки и без возачка дозвола.
Еден од возачите од Скопје, кај кого било утврдено присуство на алкохол, предизвикал и сообраќајна незгода, откако изгубил контрола над возилото и удрил во канделабра.
Од МВР информираат дека по целосното документирање на сите случаи ќе бидат поднесени соодветни поднесоци.
Воедно, од полицијата апелираат до сите учесници во сообраќајот доследно да ги почитуваат правилата и прописите, да не управуваат возило без возачка дозвола, под дејство на алкохол или во период кога им е изречена забрана за управување, со цел да се придонесе за побезбеден сообраќај.
