Во пресрет на локалните избори закажани за 19 октомври, од сабота, 23 август, започнува јавниот увид во Избирачкиот список. Увидот ќе трае 20 дена, односно до 11 септември на полноќ.
Државната изборна комисија (ДИК) ќе го заклучи Избирачкиот список најдоцна до 26 септември, а потпишаниот список и изводите од него ќе бидат готови до 3 октомври.
Права на граѓаните
Секој граѓанин кој сака да направи промена во Избирачкиот список – како запишување, дополнување или бришење на податоци – може да поднесе писмено барање:
- во подрачното одделение на ДИК или во месната канцеларија,
- по електронска пошта, со приложени докази.
Овој рок важи од 23 август до 11 септември. ДИК е должна да одговори во рок од 24 часа, а во случај на одбивање, може да се поднесе тужба до Управниот суд во ист временски рок.
Увид за затворениците
И затворениците имаат право на увид во списокот. Барањата за промени ги поднесуваат преку органот надлежен за извршување на санкциите.
Политички партии
Политичките партии можат да испраќаат барања до ДИК по електронски пат најдоцна до 11 септември. ДИК е должна да им го достави списокот во рок од три дена по завршување на увидот, а партиите ќе имаат пет дена за реакција и барања за корекции.
Улога на МВР
Министерството за внатрешни работи ќе достави податоци за:
- лица кои побарале нова лична карта или патна исправа,
- лица кои ќе наполнат 18 години до денот на изборите.
Овие граѓани ќе бидат впишани по службена должност.
