Сообраќајот на државните патишта утрово се одвива непречено, но по претежно влажни коловози, информира Авто мото сојуз на Македонија во дневниот извештај од 25 јануари 2026 година (10:00 часот).
Сите државни патишта се проодни и безбедни за сообраќај, но поради повремените врнежи од снег, од возачите се бара зголемена внимателност.
Екипите на ЈП Македонија пат се целосно ангажирани на терен, со расположлива механизација и работна сила, при што во континуитет се врши расчистување на снегот. Во координација со ЈП за државни патишта и Министерство за транспорт, се преземаат активности за непречено и безбедно одвивање на сообраќајот.
Од надлежните служби апелираат возачите да управуваат совесно и внимателно, задолжително да користат зимска опрема, да ја почитуваат поставената сообраќајна сигнализација и да ја прилагодат брзината на условите на патот. Се препорачува и навремено информирање за состојбата на патиштата преку официјалните информативни центри.
Законската обврска за поседување зимска опрема важи од 15 ноември 2025 до 15 март 2026 година, без оглед на моменталните временски услови.
Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.
АМСМ препорачува зголемено внимание на патиштата низ котлини, клисури и речни долини, каде постои можност од појава на одрони. Особено внимателно да се вози на делниците:
- Катланово – Велес
- Маврово – Дебар – Струга
- Виница – Берово
- Кочани – Делчево
Патниот правец Охрид – Ресен, преку Националниот парк Галичица, е затворен за сообраќај за сите видови возила во периодот од 21 ноември 2025 до 31 март 2026 година.
