Иако цените на електричните возила полека паѓаат, тие сѐ уште не се најисплатлива опција за секојдневна употреба, покажува најновата анализа на германскиот авто-клуб ADAC. Истражувањето направено во април ги споредува вкупните трошоци за поседување и возење на електрични автомобили, plug-in хибриди и возила со мотори со внатрешно согорување (СУС), при што електричните модели во поголемиот дел од сценаријата се покажале како поскапа алтернатива.
ADAC ги пресметал сите релевантни трошоци – набавна цена, потрошувачка, одржување и амортизација – и утврдил дека бензинските и дизелските автомобили најчесто се поисплатливи. Причините се повисоките трошоци за полнење на јавни станици и стабилните, релативно ниски цени на бензин и дизел.
Клучен фактор е и местото на полнење: сопствениците на електрични автомобили кои имаат фотонапонски систем дома и полнат со евтина струја (околу 18 центи по kWh), имаат значително пониски трошоци од оние што зависат од јавната инфраструктура, каде цените достигнуваат и до 60 центи по kWh.
ADAC направи споредба на четири различни сценарија:
18 центи/kWh (соларно полнење): електричните возила се поисплатливи кај 36% од моделите
35 центи/kWh (стандардна домашна тарифа): 28% од моделите имаат пониски трошоци од СУС
45 центи/kWh (мешано полнење): само 22% се поисплатливи
60 центи/kWh (исклучиво јавно полнење): електричните возила победуваат во само 16% од случаите
Заклучокот на ADAC е дека електричните автомобили ќе станат вистински конкурентни дури кога ќе се намалат и цената на електричната енергија и почетната цена на самите возила.
