Во гимназијата „Трајан Ѓорѓиовски и Митре Колевски“ во Пустец вчера беше претставена новата реконструкција на традиционалните машки носии од Преспа, изработени во рамки на проект посветен на зачувување и обновување на носиите на македонското, влашкото и ромското малцинство во Корчанскиот регион. Проектот го реализира Македонското друштво „Сонце“, во партнерство со неколку организации и со поддршка на албанскиот Комитет за национални малцинства.
Настанот беше продолжение на минатогодишната презентација, кога беа реконструирани четири традиционални женски носии од Преспа. Со вчерашното претставување на машките носии, ансамблот на фолклорната група добива заокружен и автентичен визуелен идентитет, кој ќе може да се претставува на национални и меѓународни сцени.
„Ова претставува значаен чекор за афирмација на македонската културна традиција. Создадовме комплет кој достојно ја претставува нашата ризница, и во земјата и надвор“, истакна претседателот на Македонското друштво „Сонце“ во Корча, Васил Стерјовски.
