Советот на Општина Пустец донесе одлука со која се спротивставува на изградба на кампови за мигранти во регионот на Преспа. Иницијативата ја покренаа советниците од Македонската алијанса за европска интеграција – единствената македонска партија во Албанија.
Одлуката беше изгласана едногласно на седница на Советот, откако предлогот беше ставен на дневен ред по барање на македонските советници.
Како што беше посочено во образложението, загриженоста се однесува на можни демографски промени, еколошки последици, влијанието врз туризмот, како и долгорочниот развој на регионот Преспа.
Со ова гласање локалната самоуправа и официјално го изрази својот став против реализацијата на проектот.
Претходно, Македонската алијанса за европска интеграција поднесе тужба до Управниот суд во Тирана, оспорувајќи ја одлуката на Владата на Албанија за отворање три центри за мигранти на територијата на општина Пустец.
Од партијата најавуваат дека ќе продолжат со институционална борба за заштита на интересите на локалното население.
Прашањето за евентуална изградба на мигрантски кампови во Преспа предизвика реакции во локалната јавност, со оглед на специфичната етничка структура и туристичкото значење на овој дел од Албанија.
