Македонската заедница во Швајцарија бележи значаен момент во своето политичко и општествено делување. На претстојните општински избори во Ешалан, дури пет кандидати со македонско потекло се најдоа на кандидатската листа за општинскиот совет L’ENTENTE Échallens.
Информацијата ја соопшти Македонско друштво Македонија – Ешалан, кое оценува дека ваквото учество претставува важен исчекор за видливоста и влијанието на Македонците во локалниот јавен живот.
Според Друштвото, кандидатурите се потврда за активното учество на Македонците во развојот на општината, како и за нивната интеграција и придонес во локалната заедница.
„Учеството на пет кандидати со македонско потекло е јасен сигнал дека нашата заедница е препознаена и уважена како дел од општествениот живот во Ешалан“, се наведува во пораката.
Македонското друштво „Македонија“ – Ешалан ги повика сите швајцарски државјани со македонско потекло:
- да се информираат за кандидатите,
- да ги разгледаат програмите и приоритетите на листата L’ENTENTE Échallens,
- и активно да учествуваат во изборниот процес.
Посебен акцент е ставен на масовна излезност, која се оценува како клучна за зајакнување на гласот и присуството на Македонците во локалната политика.
Јавен повик за излезност упати и Светски Македонски Конгрес, кој ги охрабрува Македонците по потекло со швајцарско државјанство во Ешалан да гласаат за листата на која има пет кандидати Македонци по потекло.
Од таму оценуваат дека станува збор за ретка и историска можност македонската дијаспора да го засили своето политичко присуство и да придонесе кон подобра застапеност на заедницата.
Според иницијаторите, престојните избори претставуваат клучен момент за афирмација на македонскиот идентитет и активното граѓанство во Ешалан – чекор напред кон поголема видливост, интеграција и политичка зрелост на македонската заедница во Швајцарија.
