Компанијата Audi доживеа сериозен пад на добивката во првата половина од годината – дури 37,5 проценти. Причините се повеќеслојни: американските царини, високи трошоци за реструктуирање и забавена продажба на кинескиот пазар. По оданочување, профитот изнесува 1,3 милијарди евра.
Падот доаѓа во серија – ова е третпат по ред како резултатите за првата половина од годината се полоши од претходната. Во исто време, и Volkswagen групацијата, во чии рамки работи Audi, се соочува со слични предизвици.
Намалени прогнози и неизвесна иднина
Поради негативниот тренд, Audi ја намали прогнозата за целата година. Очекуваните приходи се намалени за 2,5 милијарди евра, па сега изнесуваат меѓу 65 и 70 милијарди евра. И прогнозата за профитабилноста е ревидирана надолу.
Иако неодамнешниот трговски договор меѓу ЕУ и САД би можел да донесе олеснување, тој сè уште не е земен предвид во пресметките. „Тоа допрва ќе го процениме“, изјави финансискиот директор Јирген Ритерсбергер, додавајќи дека сепак е охрабрувачко што конечно има „одредена предвидливост“ за иднината.
Царините – удар од 600 милиони евра
Пролетното зголемување на американските царини го чинеше Audi околу 600 милиони евра само во првите шест месеци од 2025 година. За разлика од BMW, кој има своја фабрика во САД, Audi нема домашно производство на тој пазар и одлучи да не ги префрли дополнителните трошоци врз американските потрошувачи.
Ритерсбергер не откри детали за идната стратегија, но истакна дека ќе се бара „правилниот баланс меѓу цена и количина“.
Реструктуирање со висока цена
Дополнителен товар за резултатите се трошоците за реструктуирање. Претходно оваа година, Audi најави укинување на 7.500 работни места во Германија до 2029 година, а за тоа се веќе одвоени значајни средства. Овој процес веќе го чини брендот 600 милиони евра, но т.н. „футур договор“ почнал да дава позитивни резултати и веќе го ублажил дел од тој товар.
„Овие бројки ја покажуваат неопходноста од трансформацијата што ја започнавме“, нагласува Ритерсбергер. „Мораме да продолжиме со полна сила“, вели тој, додавајќи дека целта на среден рок е заштеда од преку една милијарда евра годишно.
Кина и САД – предизвикувачки пазари
Продажбата во првата половина на годината падна особено во Кина, но и во САД – два клучни пазари за автомобилската индустрија. Во Кина продолжува жестоката ценовна војна, особено во сегментот на електрични возила, што дополнително го отежнува настапот на странските брендови.
И покрај тоа, Audi се надева дека новата генерација модели ќе ја подобри конкурентноста на кинескиот пазар.
