СВР Велес поднесе кривична пријава против 45-годишен жител на Битола под сомнение за измама поврзана со онлајн продажба на блиндор врата.
Според информациите од полицијата, пријавениот во текот на октомври 2025 година преку социјална мрежа стапил во контакт со оштетено лице, нудејќи продажба и монтажа на блиндор врата. По договорот, купувачот авансно уплатил 64.500 денари.
Меѓутоа, и покрај извршената уплата, ветената врата никогаш не била испорачана, а осомничениот престанал да одговара на повиците и пораките, со што го оштетил лицето за целиот износ.
По преземените оперативни мерки и прибирањето докази, против него е поднесена кривична пријава за сторено кривично дело „измама“, а случајот ќе биде процесуиран пред надлежното обвинителство.
Од МВР апелираат граѓаните да бидат внимателни при купување производи преку интернет и да избегнуваат авансни плаќања без сигурни гаранции.
