СВР Скопје истражува тешка кражба во финансиска компанија на подрачјето на Аеродром – однесени пари, сефови и службени предмети
Непознати сторители извршиле дрска кражба во подружница на финансиско друштво во скопската населба Аеродром, при што биле одземени пари, два сефа и повеќе службени предмети.
Според информациите од полицијата, во периодот меѓу 19:00 часот вечерта на 10 февруари и 03:25 часот по полноќ, сторителите со употреба на сила и подесен алат насилно влегле во објектот. Оттаму одзеле готовина, службен печат, мобилни телефони и други вредни предмети.
Случајот бил пријавен околу 03:33 часот, по што на местото на настанот извршен е увид од страна на полициска екипа. Во тек е истрага и се преземаат мерки за идентификување и пронаоѓање на сторителите.
Од МВР засега не соопштуваат детали за висината на штетата, но велат дека се работи на целосно расчистување на случајот.
