Македонското друштво “Илинден” од Тирана смета дека прелиминарните пописни резултати за македонското национално малцинство се манипулирани и претставуваат груб пописен фалсификат!
Македонското друштво “Илинден” од Тирана остро реагира по објавените пописни резултати, кои се однесуваат на бројот на Македонците во Албанија.
Не ги признаваме и со огорченост ги отфрламе прелиминарните пописни резултати во Република Албанија, кои ги сметаме за груб пописен фалсификат, по желба на Бугарија. Јавна тајна е дека Бугарија го контролираше пописот, што го потврдува и фактот дека во Бугарија за време на пописниот период во Република Албанија, на социјалните мрежи беа објавувани фотографии од пописните формулари како се изјаснувале жителите во Република Албанија. Овие податоци се заштитени со закон, но објавуваните материјали покажуваа дека бугарските служби имале пристап до нив!
Во име на Македонците во Република Албанија не ги признаваме фалсификуваните пописни податоци за македонското национално малцинство, и истовремено бараме од албанските институции на власта и од меѓународните организации да го сторат истото, бидејќи овие фалсификувани резултати се против уставниот поредок и европските аспирации на Република Албанија.
Македонското друштво “Илинден” од Тирана бара спроведување на нов попис, заснован на меѓународни стандарди и под меѓународен мониторинг, за да се гарантира чесен и транспарентен процес кој ќе ја одразува етничката реалност во Република Албанија.
Македонското друштво “Илинден” од Тирана истовремено од Специјалното обвинителство за организиран криминал и корупција на Република Албанија бара да поведе истрага не само за ИНСТАТ, туку и за сите случаи за незаконски извршена попишувачка активност од страна на попишувачите, бидејќи отворен е сомнежот во нивната улога во пописот.
Македонското друштво “Илинден” од Тирана ги повикува европските институции, кои тврдат дека се темелат на демократското однесување кон основните човекови права, да се позанимаваат со суровото и бескрупулозно нафрлање на бугарските емисари врз македонското национално малцинство во Република Албанија!
Македонско друштво “Илинден” од Тирана ќе го информира претседателството на Федералната унија на европските националности (ФУЕН) за грубиот пописен фалсификат, затгоа што во Албанија “етнички Бугари“ нема! Во ниту еден попис од 11-те претходно спроведени, ниту едно лице не се изјаснило како Бугарин. Нив ги нема на целата територија на Албанија, освен во бугарската амбасада!
