Со години црното вино се поврзуваше со подобро кардиоваскуларно здравје, најчесто преку таканаречениот „француски парадокс“. Но, современите медицински ставови сè почесто го доведуваат во прашање ова верување.
Кардиохирургот д-р Џереми Лондон, кој има повеќе од две и пол децении искуство, истакнува дека алкохолот делува токсично врз секоја клетка во телото и дека најразумен избор е негово ограничување или целосно избегнување.
Иако црното вино содржи антиоксиданси како ресвератрол, експертите нагласуваат дека за да се постигне количина што би имала терапевтски ефект, би било потребно да се испијат нереално големи количини – што носи сериозни здравствени ризици.
Сличен став има и Британската фондација за срце, од каде појаснуваат дека истите корисни соединенија можат да се внесат преку овошје како грозје, боровинки и јагоди – без штетните ефекти на алкохолот.
Дополнително, бројни истражувања покажуваат дека консумацијата на алкохол е поврзана со зголемен ризик од повеќе видови рак, вклучувајќи ги ракот на дојката, дебелото црево и усната празнина. Дури и умереното пиење може да го зголеми овој ризик.
Иако постојат студии кои укажуваат на можни позитивни ефекти врз антиоксидативниот статус, научниците потенцираат дека се потребни долгорочни истражувања за да се утврди реалната корист.
Затоа, најчестиот совет на лекарите е јасен – за здраво срце подобро е да се избере балансирана исхрана богата со овошје и зеленчук, редовна физичка активност и квалитетен сон, наместо да се потпираме на алкохол.
