Понудата на електрични автомобили постојано расте, а цените постепено се намалуваат, но главната дилема за купувачите останува – дали тие навистина се поевтини на долг рок. Анализата на германскиот автоклуб ADAC покажува дека одржувањето на електричните модели е во просек околу една третина поевтино од споредливите бензински и дизел возила, пред сѐ поради помалиот број механички компоненти и отсуството на класични сервисни ставки како масло, филтри и свеќици.
Кај некои производители разликата е уште поголема. Трошоците за сервис кај електричните модели на BMW се и до 58 проценти пониски, додека кај Mercedes, Volkswagen и Hyundai заштедите се движат меѓу 39 и 45 проценти. Исклучок е Dacia Spring, каде во одредени случаи сервисирањето било поскапо од бензинските верзии.
ADAC утврдил дека цените значително варираат во зависност од локацијата на сервисот. Работилниците надвор од големите градови се и до 40 проценти поевтини, а речиси половина од сервисите наплаќаат повисока сатница за електрични возила – во просек за 17 проценти, најчесто поради потребата од специјализиран кадар за работа со високонапонски системи.
Кога се пресметуваат сите трошоци – гориво, осигурување, губиток на вредност и одржување – цената на електричната енергија станува пресудна.
- При 60 центи/kWh електричните се поевтини во само 16% од случаите
- При 45 центи/kWh – во 23%
- При 35 центи/kWh – во 35%
- Дури и при 18 центи/kWh – само 36% имаат предност
Споредбите меѓу модели како BMW iX2 и BMW X2, Cupra Born и Cupra Leon или Opel Astra Electric и класичниот Astra покажуваат дека електричните верзии стануваат финансиски поповолни само со евтина струја.
Стручњаците предупредуваат дека по истекот на гаранцијата, евентуалната замена на батеријата може да биде исклучително скапа и во некои случаи да ја надмине вредноста на автомобилот.
Електричните автомобили се поевтини за одржување и можат да бидат конкурентни во вкупните трошоци, но само со поволна цена на електричната енергија и внимателен избор на сервис. Во спротивно, бензинците и дизелите сѐ уште често имаат финансиска предност.
