Сериозна состојба предизвикана од неконтролираното движење на говеда е регистрирана на територијата на Општина Крива Паланка, каде што жителите од повеќе села пријавуваат штети врз земјоделски култури, пластеници, насади и приватен имот.
Од Општината информираат дека надлежните институции веќе донеле правосилни решенија и задолжителни мерки согласно законските прописи, по извршените инспекциски надзори од страна на Агенцијата за храна и ветеринарство. При контролите биле утврдени прекршувања на правилата за заштита и благосостојба на животните, како и непочитување на претходно изречените мерки.
Локалната власт нагласува дека спроведувањето на овие решенија е законска обврска и дека нивното игнорирање директно ги загрозува безбедноста на граѓаните, имотните права и јавниот ред.
Во изминатиот период до Општината пристигнале бројни поплаки од месните заедници во селата Дрење, Добровница, Киселица, Голема Црцорија, Трново, Враовиште, Узем, Кркља, Костур, Дурачка Река, Кошари и други населени места, во кои се укажува на зголемени тензии и чувство на несигурност кај населението.
Поради ваквата состојба, дел од граѓаните најавија мирен протест на 26 февруари, со цел да побараат доследно и навремено спроведување на институционалните одлуки.
Од Општина Крива Паланка посочуваат дека заедно со претставниците на 16 месни заедници активно ја следат ситуацијата и ќе преземат мерки во рамки на своите надлежности за заштита на јавниот интерес и стабилизирање на состојбата.
