Кога станува збор за хидратација, повеќето луѓе автоматски посегнуваат по вода. Но, најновите научни истражувања покажуваат дека млекото може да биде дури и поефикасно во задржувањето на течностите во телото.
Ова секојдневно пијалак, кој речиси секој го има во фрижидер, не само што ја гаси жедта, туку и подолго ја одржува хидратацијата, благодарение на неговиот специфичен нутритивен состав.
Хидратацијата е клучна за правилно функционирање на организмот. Водата учествува во регулацијата на телесната температура, варењето, циркулацијата и транспортот на хранливи материи. Дури и благ недостаток на течности може да предизвика замор, главоболки, намалена концентрација и пад на физичката издржливост.
Токму затоа научниците од Универзитет Сент Андрус спровеле истражување во кое ги споредиле различните пијалаци и нивната способност да ја одржат течноста во телото. Резултатите покажале дека, во одредени услови, млекото обезбедува подолготрајна хидратација од обичната и минералната вода.
Причината е во составот. Додека водата брзо се апсорбира и исто толку брзо се излачува, млекото содржи протеини, природни шеќери, масти и електролити, кои го забавуваат празнењето на желудникот. Тоа значи дека течноста се задржува подолго во организмот.
Особено важна улога има натриумот, кој помага во задржувањето на водата, слично како кај спортските изотонични пијалаци. Затоа некои експерти го опишуваат млекото како „природен спортски напиток“.
Дополнителна предност е што, покрај хидратацијата, млекото обезбедува и вредни хранливи материи. Само една чаша содржи калциум, протеини, витамини и минерали кои се важни за здравјето на коските, мускулите и забите.
Секако, водата останува основа на секојдневната хидратација. Но, во ситуации кога телото губи повеќе течности – како при високи температури, физичка активност или спорт – млекото може да биде корисна алтернатива или дополнување.
На крајот, експертите советуваат баланс: комбинацијата од вода и хранливи пијалаци како млекото може да помогне организмот подобро да се справи со дехидратацијата.
