Единицата за сериозен криминал и кривични дела против културно наследство при Одделот за сузбивање на организиран и сериозен криминал поднесе кривична пријава против Е.Љ. (27) од Скопје, поради сомнение за сторено кривично дело „неовластено производство и пуштање во промет на наркотични дроги, психотропни супстанции и прекурзори“.
Како што информираат од МВР, кривичната пријава е поднесена на 21 април 2026 година до Основното јавно обвинителство Скопје.
Според информациите, претходно, на 20 април околу 22 часот, полициски службеници од Одделот за сузбивање на организиран и сериозен криминал, во координација со СВР Скопје, сопреле патничко возило „мерцедес“ на улицата „Ѓорче Петров“ во Скопје. Возилото го управувало лице од Скопје, а како совозач во него се наоѓал и пријавениот Е.Љ.
При извршениот преглед кај него биле пронајдени 29,24 грама кокаин, по што бил лишен од слобода.
По предлог на надлежните органи, судија на претходна постапка му определил мерка притвор во траење од 30 дена.
