Министерството за внатрешни работи ги известува граѓаните дека нема потреба да ги доставуваат во полициска станица потврдите за платените санкции изречени преку сообраќајниот систем „Безбеден град“, доколку казната е платена во банка или по електронски пат.
Како што соопштуваат од МВР, системот на Министерството е автоматски поврзан со системот на Министерството за финансии, што значи дека извршената уплата се евидентира без потреба од дополнително приложување на доказ за плаќањето.
Од Министерството посочуваат дека граѓаните, при уплатата, треба точно да ја пополнат уплатницата во согласност со правната поука наведена во записникот. Тоа подразбира прецизно внесување на единствениот број од записникот во полињата „повикување на број“ и „цел на дознака“.
МВР апелира граѓаните да не носат потврди за извршената уплата во полициските станици, со цел да си заштедат време и да се избегнат непотребни гужви.
